Қазақ халқының ұлы ақыны, ағартушысы Абай Құнанбайұлының 175 жылдық мерейтойын жоғары деңгейде мерекелеу туралы Қазақстан Президенті Қасым-Жомарт Тоқаев жарлыққа қол қойған болатын.
⠀
Осыған орай, Алматы қаласы Оқушылар сарайы ұлы ақын және ойшыл Абай Құнанбаевтың 175 жылдығына арналған аспаптық орындау бойынша қашықтықтан халықаралық байқау өткізді.
⠀
Байқауға балалар музыка және өнер мектептері мен басқа да білім беру мекемелерінің оқушылары қатысты. Аталған сайыста 7 – 18 жас аралығындағы 598 үміткер өз бақтарын сынады. Оның ішіндегі 20 қатысушы басқа елдерден (Ресей, Оңтүстік Корея, Өзбекістан, Қырғызстан) қатысты.
⠀
Өлмейтұғын сөз ғана емес, өлмейтұғын ән қалдырған Хакім Абайдың музыкалық мұрасы бірден – бір сүбелі сала. Абайдың музыкасы, композиторлық қырының да өзіндік мектебін қалыптастырушы ұстаз деп айтуға толық болады. Абай өлеңдері Қазақ сахарасына тез тарап, халықпен тез қауышуы – естуге жайлы, есте сақтауға да, айтылуға да қолайлы байсалды әуендерімен үндестікте келуінің нәтижесі.
⠀
Абайдың композиторлық шеберлігі – қазақ музыкасына жаңа леп қосуымен эстетикалық танымдық, философиялық, идеялық – тәрбиелік маңызының артуына жол ашушы. Міне біздің байқаудың мақсаты ұлы Абай өлеңдерін дәріптеп, рухани құндылықтарын, шығармашылық мұрасын кеңінен насихаттау.
