3 сәуір күні Алматы қаласы Білім басқармасына қарасты Оқушылар сарайының эколого-биологиялық бөлімінде «Ғылыми көктем – 2025» атты ғылыми-зерттеу жұмыстары мен экологиялық жобалар қалалық конференциясының алғашқы күні өтті. Бұл шара – «Табиғатты аялайық» атты жас экологтар, өлкетанушылар мен натуралистердің қалалық форумының бір бөлігі болды.
Конференция жылы шырайлы, шабытты атмосферада өтіп, 7–11 сынып оқушыларын біріктірді. Олар өздерінің зерттеу және жобалық жұмыстарын түрлі бағыттар бойынша қорғады. Конференцияның басты мақсаты – жасөспірімдерді қоршаған ортаны қорғауға бағытталған өзекті мәселелерді шешуге тарту, зерттеушілік дағдыларын дамыту, табиғатқа саналы көзқарасты қалыптастыру.
Қатысушылардың жұмыстары кең ауқымды тақырыптарды қамтыды: биологиялық әртүрлілікті сақтау, орнықты даму, экологиялық бизнес идеялар мен инновациялық шешімдер. Конференция келесі номинациялар бойынша өтті:
• «Жасыл қала» – қоршаған ортаны жақсартуға бағытталған технологиялар;
• «Болашаққа көзқарас» – экологиялық білім беру, еріктілік жобалар мен қоғамдық ұйымдардың қызметі;
• «Инновациялық экологиялық бизнес-идеялар» – экологиялық таза технологиялар арқылы өмір сапасын арттыру;
• «Жануарлар әлемі» – зоология, жануарларды ұстау мен өсіру, экожүйедегі рөлі.
Әр қатысушыға өз жұмысын қорғау үшін 7 минут уақыт берілді. Жобаларын қорғау барысында олар макет, үлгі, бейне және өзге де көрнекі құралдарды пайдаланды. Қазылар алқасы зерттеу тақырыбының өзектілігін, жаңашылдығын, практикалық маңызын, қатысушының жеке үлесін және сөйлеу шеберлігін бағалады.
Шараны ұйымдастырған Эколого-биологиялық бөлімнің өкілдері оқушылардың жоғары дайындық деңгейін ерекше атап өтті және жетекшілеріне алғыс білдірді. Жеңімпаздар дипломдармен марапатталады, марапаттау рәсімінің күні қосымша хабарланады.
«Ғылыми көктем – 2025» конференциясы тағы да бір рет дәлелдеді: алматылық жастар – экологияға бейжай қарамайтын, ғылымға құштар, табиғатты қорғауға өз үлесін қосуға дайын ұрпақ.