Алматы қаласындағы Оқушылар сарайының Үлкен концерт залы алғаш рет 42 жыл ішінде толық жаңғыртудан өтті. Жөндеу жұмыстары 2024 жылғы қыркүйектен 2025 жылғы наурызға дейін созылды.
Жаңғырту барысында залдың тарихи келбеті мен бірегей акустикалық дизайны сақталды. Интерьердің 1 639 шаршы метр аумағында декоративті гипстік элементтер, көрермен орындықтары және еден жабындары жаңартылды. Зал соңғы буындағы цифрлық микшерлік пульті бар кең жолақты кеңістіктік дыбыс жүйесімен жабдықталды. Сондай-ақ, 100-ден астам прожекторлар мен софиттері бар динамикалық жарықтандыру жүйесі орнатылды, бұл әртүрлі форматтағы іс-шараларды өткізуге мүмкіндік береді.
Сахнаның айналмалы механизмі, кулисалар, бас перде және электрмен жабдықтау жүйесі толықтай ауыстырылды. Сонымен қатар, цифрлық басқару жүйесі бар жоғары технологиялық LED-экрандар орнатылды.
Жаңартылған зал балалар мен жасөспірімдерге арналған мәдени және білім беру іс-шараларын жоғары деңгейде өткізуге мүмкіндік береді. Бұл жаңғырту Алматы қаласы әкімінің бастамасымен жүзеге асырылды.
