2025 жылғы 14 наурызда Алматы қаласындағы Оқушылар сарайында «Менің Отаным – Қазақстан» атты қалалық туристік-экспедициялық отрядтар слеті өтті. Іс-шараның мақсаты – балалар мен жастардың патриоттық сезімін қалыптастыру, азаматтық жауапкершілігін арттыру, сондай-ақ оларды туристік қызметке белсенді тарта отырып, салауатты өмір салтын насихаттау.
Іс-шараның негізгі мақсаты – жас ұрпақты туған өлкенің тарихи, мәдени және табиғи мұрасын зерттеуге баулу. Слеттің басты міндеттері:
• зерттеушілік және тәжірибелік қызметке қызығушылық танытатын оқушыларды анықтау және қолдау;
• үздік балалар экспедициялық отрядтарын анықтау;
• Қазақстанның туристік әлеуетін зерттеу және насихаттау;
• балаларды туристік іс-шараларға тарту арқылы қосымша біліммен қамтуды кеңейту.
Слетке Алматы қаласындағы қосымша білім беру мекемелері мен жалпы білім беретін мектептердің 12-16 жас аралығындағы оқушылары қатысты.
Слет аясында бірнеше байқау ұйымдастырылды:
1. «Менің кіші Отаным» – балалар туризмі туралы бейнероликтер байқауы. Жұмыстар жаңашылдығы, қоғамдық маңыздылығы, мазмұн тереңдігі және түпнұсқалығы бойынша бағаланды.
2. «Туристік маршруттар» – туристік бағыттарды әзірлеу және таныстыру байқауы. Бағыттар тарихи, мәдени, рухани және табиғи нысандарды қамтуы тиіс. Бағалау өлшемшарттары: түпнұсқалық, логикалық құрылым, туристік объектілердің қанықтығы, сапалы рәсімделуі.
3. «Туристік әндер байқауы» – туристік тақырыптағы әндерді орындау сайысы. Қатысушылардың вокалдық шеберлігі, сахналық мәдениеті, көрерменмен байланыс орнату қабілеті бағаланды.
Барлық қатысушылар өздерінің еңбегі мен талантының нәтижесінде лайықты марапаттарына қол жеткізді. Бұл слет – олардың жаңа белестерге бастар жолының бір ғана кезеңі. Біз әр балаға шабыт, қажымас қайрат және жарқын жеңістер тілейміз! Алдағы уақытта да биіктерді бағындырып, өздерінің жаңа жетістіктерімен қуанта берсін!